വരാം.

എന്നിലേക്ക് നീ വരിക.
തീണ്ടാത്ത ഇരുട്ടും
തീരാത്ത വാക്കും നിറയുന്ന എന്നിലേക്ക്.
എന്നിലേക്ക് നീ വരിക,
നഷ്ട്ടപ്പെട്ട് വളപ്പൊട്ടും,
പുളിപ്പുള്ള മാങ്ങയും ഒളിപ്പിച്ച എന്നിലേക്ക്.
എന്നിലേക്ക് നീ വരിക
പ്രണയിച്ച കണ്ണുള്ളവനെ,
ഞാന്‍ നിന്റെ ആത്മാവിന്റെ ജന്മനാടല്ലേ?
നിന്നിലേക്ക് ഞാനും വരാം,
കിലുങ്ങുന്ന കുപ്പിവളയും,
കോതി വെച്ച മുടിച്ചുരുളും മുല്ലയും കൊണ്ട്.

മഴയുടെ അവിഹിതബന്ധം.

ഇന്നലെ പെയ്ത മഴയും
എന്റെ ജാലകവിരിയും പ്രണയിച്ചു.
ശുഭ്രവസ്ത്രത്തില്‍ നനഞ്ഞു
കാമുകിയായി അവള്‍ നിന്നു.
കാറ്റു വന്നു പുണര്‍ന്നു,
അവള്‍ ഗര്‍ഭിണിയായി.
അവള്‍ പെറ്റ കുഞ്ഞിനു
മണ്ണിന്റെ മണമായിരുന്നു.

പൂക്കള്‍ പ്രണയിക്കാറില്ല
പ്രണയം പക്ഷേ പൂക്കുന്നു
ചെമ്പരത്തിയെ നോക്കൂ...


കടപ്പാട്: ഇക്കാക്ക

Lovers Eyes

Your eyes.
Lovely, dark and deep.
I wanted to dive into them,
See the world I saw in them.
I dived.
You had cataract.

യഥാര്‍ത്ഥ പ്രണയം...

പ്രിയപ്പെട്ടവളെ,
നീ ഒരാണായിരുന്നെങ്കില്‍ ഒരു സ്വവര്‍ഗ്ഗപ്രേമി ആകാന്‍ ഞാന്‍ ആഗ്രഹിക്കുമായിരുന്നു...

വിത്ത്.

ഒന്നാം ക്ലാസില്‍
ചില്ല നിറച്ചും വളപ്പൊട്ടു കാണാന്‍
ഞാന്‍ വളപ്പൊട്ടു നട്ടു.
മൂന്നാം ക്ലാസില്‍
വര്‍ണ്ണച്ചിറകുകള്‍ പൊഴിയാന്‍
ഞാന്‍ പൂമ്പാറ്റയെ നട്ടു.
നാലാം ക്ലാസില്‍
മാധുര്യം പെയ്യുന്ന മരത്തിനായി
ഞാനൊരു മിഠായി നട്ടു.
ഒന്നും മുളച്ചില്ല.
എന്നിട്ടും....
ഇന്നലെ
സ്വപ്നങ്ങള്‍ തിങ്ങി വളരാന്‍,
ഞാ‍ന്‍ എന്റെ സ്വപ്നം നട്ടു.

ആഞ്ഞടിച്ച കാറ്റിനും
കുതിര്‍ത്തൊഴിഞ്ഞ മഴക്കും ശേഷം,
മറഞ്ഞു കിടന്ന മഞ്ചാടിയും...
മരമായി വളരും.

ഒരു ഗോതമ്പുമണിയായി ഞാനും,
മണ്ണില്‍ പൂണ്ടു.
മഴയും വെയിലും കാറ്റുമായി നീ,
ഞാന്‍ വളരില്ലേ?